ភ្នំពេញ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី បានផ្ញើសារអបអរសាទរ និងជូនពរចំពោះប្រធានរដ្ឋសភា លោកស្រី ឃួន សុដារី ដែលទើបទទួលបានគោរមងារជា «សម្ដេចមហារដ្ឋសភាធិការធិបតី» ពីព្រះមហាក្សត្រនៅថ្ងៃទី២ ខែកញ្ញា ឆ្នាំ២០២៣នេះ។

ក្នុងសារលិខិតអបអរសាទរនិងជូនពរសម្ដេចមហារដ្ឋសភាធិកាធិបតី ឃួន សុដារី លោករដ្ឋមន្ត្រី ជា សុមេធី បានលើកឡើងថា ការប្រោសព្រះរាជទានគោរមងារដ៏ឧត្តុង្គឧត្តមនាពេលនេះ គឺពិតជាស័ក្តិសមជាទីបំផុតដែល សម្ដេចមហារដ្ឋសភាធិការធិបតី ឃួន សុដារី បានលះបង់ និងខិតខំបំពេញភារកិច្ចដ៏ថ្លៃថ្លាជូនប្រទេសជាតិ និងមាតុភូមិនាពេលកន្លងមក ហើយទទួលបានការគាំទ្រយ៉ាងខ្លាំងក្លាពីប្រជាពលរដ្ឋ។

ក្នុងនាមថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់នៃក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី ជឿជាក់ថា រដ្ឋសភាដែលមាន សម្ដេចមហារដ្ឋសភាធិកាធិបតី ជាប្រធានពិតជានឹងធ្វើឱ្យមាតុភូមិកម្ពុជាកាន់តែមានសុខសន្តិភាព ស្ថិរភាព និងវិបុលភាព។

គួរឲ្យដឹងផងដែរថា ប្រធានរដ្ឋសភាលោកស្រី ឃួន សុដារី ត្រូវបានព្រះមហាក្សត្រសព្វព្រះរាជទានប្រទានគោរមងារជា «សម្ដេច» នៅថ្ងៃទី២ ខែកញ្ញា ឆ្នាំ២០២៣នេះ។

ការត្រាស់បង្គាប់ផ្ដល់គោរមងារនេះគឺបន្ទាប់ពីព្រះមហាក្សត្របានសម្រេចកំណត់គោរមងារជា «សម្ដេច» ជូនដល់ប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រីនៅថ្ងៃដដែល៕